A formación Sumar Galicia contará con 36 representantes na asemblea estatal que a organización política celebrará a finais de marzo en Madrid. A elección dos delegados realizouse este sábado na localidade do Milladoiro, en Ames, durante unha reunión da coordinadora nacional de Movemento Sumar Galicia.
A delegación galega estará encabezada pola portavoz no Congreso e deputada por Pontevedra, Verónica Martínez Barbeiro, quen acudirá como delegada nata xunto ao tamén parlamentario Manuel Lago, o secretario xeral de Sumar Galicia, Paulo Carlos López, e a candidata nas últimas eleccións galegas, Marta Lois. Xunto a eles, viaxarán a Madrid outros 32 delegados galegos.
UNHA DAS DELEGACIÓNS MÁIS NUMEROSAS
Antes do encontro, Martínez Barbeiro e Paulo Carlos López destacaron que Galicia será “unha das delegacións máis numerosas” na asemblea estatal de Sumar, xa que o territorio galego é “a quinta comunidade con máis afiliados” dentro da organización.
Para López, este dato demostra “a plurinacionalidade” do proxecto político, que aposta por reforzar medidas laborais e a defensa dos traballadores. “Para seguir subindo o Salario Mínimo Interprofesional (SMI) e reducir a xornada laboral, necesitamos un Sumar máis forte a nivel organizativo e con iniciativa política“, afirmou.
A asemblea estatal de Sumar, impulsada pola vicepresidenta segunda do Goberno, Yolanda Díaz, servirá para definir a estratexia da formación nos próximos anos e consolidar o seu papel dentro do panorama político español.
