O portavoz da Executiva do PSdeG, Julio Torrado, rexeitou este venres que a situación que atravesa o Grupo Municipal Socialista dilate a aprobación dos orzamentos no Concello de Santiago e lembrou que sacar adiante estas partidas é un asunto que lle “corresponde ao goberno local”.
Preguntado respecto diso nunha rolda de prensa ofrecida este venres, Torrado subliñou que a aprobación ou non das contas municipais non é “responsabilidade dun partido que non goberna” na localidade e que debe de ser o “equipo de goberno” quen formule o proxecto.
“Estou seguro de que se o goberno local de Santiago formula uns orzamentos que sexan bos, aprobaranse. E se formula uns que non son bos, non se aprobarán”, dixo para soster que é “o natural en democracia”.
Dito isto, considerou que a alcaldesa da capital galega, a nacionalista Goretti Sanmartín, “está ás veces máis preocupada do que fan os demais” que do que fai o seu propio goberno.
Todo iso nunha rolda de prensa na que volveu a rexeitar pronunciase sobre o expediente de expulsión aberto a catro do seis edís do PSOE no Consistorio e remarcou que se trata dun procedemento “garantista”.
