Un grupo de corenta persoas constituíu oficialmente a Asociación Veciñal Pego-Sar tras unha asemblea celebrada na Casa da Cultura de Brión. A entidade desenvolverá a súa actividade principalmente nos lugares de O Cabo, Cirro, Gándara, O Rial, Outeiro e Vilanova, pertencentes á parroquia dos Ánxeles.
Os estatutos da asociación foron aprobados por unanimidade e inclúen unha cláusula que garante a independencia da entidade e a súa neutralidade política. Segundo recollen os documentos fundacionais, ‘calquera persoa que ocupe un cargo na Xunta Directiva non poderá presentarse como candidata en ningún proceso electoral, a calquera nivel de representación política, durante o período no que exerza as súas funcións na directiva”.
OBXECTIVOS E ACTIVIDADES
A nova entidade veciñal nace coa finalidade de representar os intereses da veciñanza ante as administracións públicas e outras entidades, ademais de promover o desenvolvemento social, cultural e económico da comunidade. Entre os seus obxectivos tamén figura a protección do medio natural e do patrimonio rural e o fomento da convivencia e da participación cidadá.
Para acadar estes fins, a asociación prevé a realización de diversas iniciativas, entre as que destacan:
- Reunións, charlas e encontros informativos sobre cuestións de interese comunitario.
- Eventos culturais, deportivos e festivos para fortalecer os lazos entre os veciños.
- Xestión de proxectos e melloras en infraestruturas e servizos rurais.
- Campañas de sensibilización e actividades formativas en áreas como sustentabilidade, agricultura ou conservación ambiental.
- Programas educativos e recreativos para a infancia, co obxectivo de fortalecer o seu vínculo coa contorna e fomentar a convivencia.
XUNTA DIRECTIVA
Na mesma asemblea aprobouse a primeira xunta directiva da Asociación Veciñal Pego-Sar, que queda conformada por:
- Iván Mosquera Cid, presidente.
- Marisa Vales Cerqueiro, vicepresidenta.
- Eliseu Mera Quintas, secretario.
- María del Busto Griñón, tesoureira.
- Laura Pazos Pintor, vogal.
A asociación está á espera da súa inscrición no Rexistro de Asociacións da Xunta de Galicia para poder comezar a operar oficialmente. Unha vez completado este trámite, convocarase unha nova asemblea para definir as liñas de actuación prioritarias e trasladar as súas demandas ao Concello de Brión e aos grupos municipais.
