O Ateneo de Santiago, en colaboración coa Asociación Federalista de Galicia, celebrará o vindeiro luns, 10 de febreiro, ás 19:30 horas, un encontro titulado ‘Castelao. Política no exilio: Nación e Federalismo’. O acto, que terá lugar no salón de actos de Afundación, sito na Rúa do Vilar, 19, reunirá dous destacados expertos no estudo da figura de Castelao e o seu pensamento político: Ramón Villares e Ramón Máiz.
O diálogo insírese na conmemoración do Ano Castelao e pretende afondar no papel do intelectual galeguista durante o seu exilio político, explorando a súa concepción da nación galega e o seu posicionamento sobre o federalismo.
UNHA ANÁLISE SOBRE O LEGADO POLÍTICO
O historiador Ramón Villares Paz, catedrático de Historia Contemporánea e profesor emérito da Universidade de Santiago de Compostela, ofrecerá unha perspectiva baseada na súa ampla traxectoria académica. Villares foi tamén presidente do Consello da Cultura Galega durante doce anos e é membro numerario da Real Academia Galega. No encontro, abordará as principais ideas políticas de Castelao e o seu impacto na historia recente de Galicia.
Pola súa banda, Ramón Máiz Suárez, catedrático de Ciencia Política na USC e presidente da Asociación Federalista de Galicia, analizará a actualidade do pensamento castelaán no contexto político actual. Investigador en áreas como o nacionalismo, o federalismo e a historia institucional, Máiz achegará unha visión comparativa entre a proposta política de Castelao e os debates vixentes sobre a organización territorial do Estado.
