A Festa da Filloa de Lestedo celebrará o vindeiro 9 de marzo a súa 42ª edición cunha ampla programación de actividades que arrinca esta semana e que, por primeira vez, se estenderá máis aló da provincia da Coruña. O evento, que recentemente foi declarado Festa de Interese Turístico Nacional, supón un recoñecemento ao traballo da veciñanza e das entidades implicadas na súa organización.
O alcalde de Boqueixón, Ovidio Rodeiro, e o presidente da Asociación Cultural da Filloa, José Manuel Canabal, presentaron este martes o programa oficial da festa nun acto no CIFP Compostela, acompañados pola directora de Promoción da Axencia de Turismo de Galicia, Carmen Pita, o director do centro, Ramiro Esparís, e a actriz e presentadora María Mera.
Durante a presentación, Ovidio Rodeiro destacou a importancia da declaración como Festa de Interese Turístico Nacional, sinalando que ‘é o resultado do esforzo da Asociación Cultural da Filloa, o Concello, os patrocinadores e, sobre todo, os veciños de Lestedo, que foron quen de converter unha festa parroquial nun evento coñecido en toda España’.
O rexedor tamén anunciou que a programación deste ano incluirá máis actividades ca nunca, grazas ao recente irmandamento coa Feira do Cocido de Lalín. Segundo Rodeiro, este acordo supón ‘un espello no que mirarse e unha oportunidade para aprender da primeira festa gastronómica con recoñecemento de Interese Turístico Internacional’.
Pola súa banda, José Manuel Canabal, presidente da Asociación Cultural da Filloa, subliñou que este recoñecemento ‘poñerá en valor a tradición das filloas e o traballo das xeracións que mantiveron viva esta festa ao longo dos anos’. Canabal recomendou que os asistentes proben dúas das elaboracións máis características da edición deste ano: filloas recheas de Porco Celta e Filloas de Cocido, resultado da colaboración coa Feira do Cocido de Lalín.
TODA A PROGRAMACIÓN
O domingo 9 de marzo, día grande da Festa da Filloa, o evento contará co Gran Desfile Intermunicipal dos Xenerais da Ulla, no que participarán máis de cincuenta xenerais e xeneralas. Ademais, a tradicional máquina filloeira, capaz de elaborar preto de 2.000 filloas cada hora, funcionará desde primeira hora da mañá. Paralelamente, as filloeiras e filloeiros prepararán as filloas á pedra, doces e recheas, mantendo viva a tradición artesanal da festa.
A programación previa inclúe varias actividades de promoción, tanto dentro como fóra da provincia, como un showcooking e degustacións en Lalín, no marco da IV Feira Internacional de Apicultura; un desfile dos Xenerais da Ulla na LVII Feira do Cocido de Lalín o 23 de febreiro, e xornadas gastronómicas no centro comercial El Corte Inglés, con degustacións gratuítas de filloas os días 28 de febreiro, 1, 3 e 4 de marzo.
Tamén se celebrará a terceira edición da Festa da Filloíña, o 1 de marzo, con actuacións musicais e un pregón infantil a cargo do alumnado do CPI Antonio Orza Couto. O evento contará ademais cos Atranques de Xeneraliños da Ulla e un concurso de disfraces infantil, así como un concerto de Uxía Lambona e a Banda Molona.
Por outra banda, o Filloa Cooking, a sección dedicada a showcookings, ofrecerá cinco sesións no local social de Lestedo. A primeira, titulada ‘Orixes Galegas’, terá lugar o 2 de marzo e será impartida polo chef Alberto Lareo, do restaurante Maina en Santiago de Compostela.
