A parroquia dos Ánxeles, en Brión, contará a partir deste venres, 7 de novembro, cunha nova entidade veciñal que pretende reforzar a participación cidadá e mellorar a interlocución coas administracións locais. A Asociación Veciñal Pego-Sar celebrará a súa asemblea constitutiva ás 20:00 horas na Casa da Cultura de Brión, marcando o inicio oficial dun proxecto que busca dar voz aos habitantes de varios lugares da parroquia.
A nova entidade incluirá a poboación dos lugares de O Cabo, O Rial, Outeiro, Vilanova, Gándara e Cirro, coa intención de traballar de forma colaborativa para trasladar as necesidades da veciñanza ao Concello de Brión. Ademais, a asociación tamén ten previsto organizar actividades culturais e de coñecemento do medio, complementarias ás xa existentes na zona.
A iniciativa xurdiu a través dun grupo promotor que abriu unha canle de comunicación a través de WhatsApp, á que xa se adheriron cincuenta persoas en menos dunha semana.
