O Concello de Ames está a levar a cabo unha serie de melloras na Biblioteca municipal do Milladoiro co obxectivo de habilitar unha sala de estudo con acceso ininterrompido as 24 horas do día, todos os días da semana. A través dun sistema de acceso mediante código QR, este espazo permitirá que os usuarios poidan facer uso del sen depender do horario habitual da biblioteca.
As obras, que comezaron este martes 28 de xaneiro, están a ser executadas pola empresa Construcciones Iglesias Mera cun orzamento total de 15.464 euros. A aula de estudo permanecerá pechada de forma temporal durante o período das obras, aínda que a biblioteca continúa ofrecendo servizos con normalidade.
Os traballos céntranse en habilitar un acceso independente desde a rúa de Abaixo, que inclúe a instalación dunha nova porta, melloras na accesibilidade e un sistema de lectura de códigos QR que permitirá a apertura dunha fechadura automática. Ademais, instalarase unha cámara de vídeo-vixilancia na entrada para reforzar a seguridade do espazo.
O alcalde de Ames, Blas García, explicou que esta iniciativa responde a unha demanda da veciñanza: ‘A veciñanza reclamaba un lugar de estudo que non dependese do horario do persoal municipal. Con esta actuación, Ames contará coa súa primeira sala de estudo aberta permanentemente’. Ata agora, o acceso á sala de estudo realizábase a través do espazo principal da biblioteca, situado na rúa Raxoeira. Con esta remodelación, preténdese que os usuarios poidan entrar directamente á aula de estudo sen pasar polo interior da biblioteca.
UN ESPAZO DIFERENCIADO E MODERNO
A nova configuración da biblioteca e a sala de estudo optimiza a distribución dos seus 483,26 metros cadrados. A biblioteca mantén unha superficie de 258,47 metros cadrados, mentres que a sala de estudo contará con 224,79 metros cadrados de uso exclusivo para usuarios que precisan un espazo de traballo tranquilo e accesible durante todo o día.
Durante o horario nocturno, a porta que conecta a biblioteca coa aula de estudo permanecerá pechada, mentres que no horario diúrno seguirá habilitada a comunicación entre ambos espazos.
Mentres a sala de estudo funcionará de forma continua, a biblioteca municipal manterá o seu horario habitual. De luns a venres, atenderá ao público de 9:00 a 20:50 horas, e os sábados de 9:00 a 13:50 horas. Durante o verán, do 16 de xuño ao 15 de setembro, o horario reducirase, sendo de luns a venres de 9:00 a 14:00 horas.
