O prezo dos autobuses urbanos de Santiago podería sufrir un incremento nas próximas xornadas, logo de que o Congreso dos Deputados non aprobase o decreto ómnibus que incluía as axudas ao transporte público. Ata agora, as bonificacións permitían que os usuarios cun bono pagasen 30 céntimos por viaxe, pero a falta de respaldo político fará que nos próximos días se vexa incrementado nuns céntimos o prezo de cada viaxe.
IMPACTO DIRECTO NAS TARIFAS
O prezo estándar con bono é de 60 céntimos por viaxe, dos que o Goberno central asumía o 30% (18 céntimos) e o Concello de Santiago engadía outro 20% (12 céntimos). A retirada das bonificacións do Estado levará a que o custo do billete ata os 42 céntimos, aínda co mantemento da achega municipal.
Desde a Concellería de Mobilidade, dirixida por Xan Duro, explicaron que a decisión sobre as tarifas require aínda de avaliacións técnicas e económicas. Por agora, descoñécese se Raxoi aumentará a súa parte da bonificación ou se o prezo final se axustará de forma proporcional a longo prazo.
Segundo se indicou dende o Concello, intetarán actualizarse os prezos o antes posible, en canto por medios técnicos sexa posible, aínda que se prevé que se comece a facer antes do 1 de febreiro. Aquelas persoas, pola contra, que dispoñan do abono de autobús municipal seguirán pagando a 30 céntimos a súa viaxe até que este non caduque.
ESCENARIO POLÍTICO E POSIBLE SOLUCIÓN
O fracaso no Congreso do decreto ómnibus, que englobaba varias medidas como as bonificacións ao transporte e a revalorización das pensións, deixa a situación nun limbo político. O rexeitamento, liderado polo PP, Vox e Junts, xustificouse pola inclusión de disposicións alleas, como a devolución dunha sede histórica en París ao PNV.
Non obstante, tanto o PP como Junts anunciaron que estarían dispostos a apoiar un decreto específico que trate exclusivamente as bonificacións ao transporte e outros puntos relevantes. Se o Goberno central consegue sacar adiante esta medida, poderían restablecerse as condicións actuais das tarifas.
