O Panteón de Galegas e Galegos Ilustres, en San Domingos de Bonaval, acolleu este mediodía un acto cívico para conmemorar o 75 cabodano do falecemento de Alfonso Daniel Rodríguez Castelao, unha das figuras máis relevantes da historia contemporánea de Galicia. A celebración, organizada pola Fundación Castelao, o Consello da Cultura Galega e o Museo do Pobo Galego, contou coa presenza de representantes de institucións como a Xunta de Galicia, o Parlamento galego, a Deputación da Coruña e o Concello de Santiago, así como de numerosas entidades e cidadáns que quixeron render homenaxe a Castelao.
O presidente da Fundación Castelao, Miguel Anxo Seixas Seoane, destacou na súa intervención que o intelectual rianxeiro foi un “persoeiro polifacético” que dedicou a súa obra a conectar co pobo galego. “Debuxou, escribiu e deu dignidade ás xentes de Galicia, converténdose nun dos seus símbolos máis queridos”, subliñou Seixas, engadindo que “celebrar a Castelao é tamén mellorarnos como persoas”.
A homenaxe incluíu unha ofrenda floral conxunta ante o sartego de Castelao, encabezada polos representantes das entidades organizadoras e diversas autoridades, entre as que se atopaban o presidente do Parlamento de Galicia, Miguel Ángel Santalices Vieira; a alcaldesa de Santiago, Goretti Sanmartín Rei; o conselleiro de Cultura, Lingua e Xuventude, José López Campos; e o presidente da Deputación da Coruña, Valentín González Formoso. A ofrenda contou coa participación da Asociación do Traxe Galego, que depositou un ramo de doce rosas brancas, simbolizando os meses do Ano Castelao, declarado pola Xunta de Galicia para 2025.
O acto, conducido pola poeta e patroa da Fundación Castelao Noelia Gómez, contou coa interpretación musical da soprano Beatriz Riobó Agulla, o frautista Fernando Raña Barreiro e a arpista Alba Barreiro Mariño. Entre as pezas interpretadas destacou a Foliada de Negreira, unha das favoritas de Castelao, e a emblemática canción Lela, vinculada á súa obra teatral Os vellos non deben de namorarse.
Ademais da música, as persoas asistentes foron agasalladas cunha lembranza especial de Bonaval e puideron degustar unha sopa elaborada por Lucía Freitas, inspirada na serie de debuxos humorísticos de Castelao, Cousas da vida.
