O Concello de Ames, a través da Concellaría de Deportes, celebrou este sábado, 28 de decembro, a primeira edición da Gladiator Race Kids, un evento deportivo enmarcado na programación de Nadal 2024. A carreira, organizada pola empresa NOKAO, reuniu un total de 230 nenos e nenas na área deportiva do Milladoiro, consolidándose como unha proposta innovadora e familiar.
A proba, deseñada como unha carreira non competitiva, buscou fomentar o deporte e a convivencia en familia. A actividade estruturouse en dous percorridos: un de 500 metros dirixido a menores de 3 a 5 anos e outro de 900 metros para participantes de 6 a 11 anos. Ademais, a saída organizouse en quendas, permitindo que un máximo de 15 nenos e nenas iniciaran a carreira cada cinco minutos.
Os pequenos participantes, tras superar unha serie de obstáculos e desafíos, recibiron unha medalla conmemorativa ao rematar, premiando o esforzo e a participación de cada un.
A concelleira de Deportes, Susana Señorís, destacou o éxito desta primeira edición: ‘Estamos moi satisfeitos coa acollida que tivo a Gladiator Race Kids. En tempo récord cubríronse as 230 prazas dispoñibles, o que demostra o interese das familias por este tipo de actividades. Desde o Concello de Ames traballamos por ofrecer propostas variadas que axuden a crear recordos inesquecibles e fomenten o deporte en familia’.
A Gladiator Race Kids foi recibida con entusiasmo polas familias asistentes, converténdose nunha das actividades máis destacadas do Nadal en Ames. O evento non só promoveu a actividade física, senón tamén valores como o compañeirismo e a superación persoal entre os máis pequenos.
