O líder do Partido Popular de Santiago, Borja Verea, criticou este luns a postura do BNG e da alcaldesa compostelá, Goretti Sanmartín, respecto á implementación da taxa turística. Verea acusou aos nacionalistas de empregar a taxa como “arma política” e afirmou que a súa xestión depende agora exclusivamente do goberno municipal.
Verea subliñou que o Partido Popular xa completou o seu labor permitindo que a taxa poida aplicarse a partir do 1 de xaneiro. “Está demostrado que hai unha política útil para Santiago, e esa é a do Partido Popular”, declarou, engadindo que o BNG “parece máis preocupado en buscar escusas e crear conflitos que en xestionar os temas importantes para a cidade”.
O portavoz popular cualificou de “lamentable” a actitude de Sanmartín, á que acusou de actuar como “hooligan do BNG” en lugar de como “a primeira representante pública de Santiago”. Verea asegurou que a alcaldesa “antepón os intereses do partido nacionalista aos dos composteláns” e criticou a falta de coherencia do BNG respecto aos acordos alcanzados coa Xunta sobre a taxa.
Verea afirmou que o BNG debería centrarse en implementar a taxa turística e abandonar o que denominou como “marear a perdiz”. O líder popular lamentou que, a pesar de defender publicamente a necesidade da taxa, os nacionalistas parecen dubidar na súa xestión. “¿Querían unha taxa turística pero agora non queren xestionala? ¿Que broma é esta?”, preguntouse.
Para concluír, instou ao goberno local a “poñerse a traballar dunha vez polo ben da cidade” e deixarse de “escusas e enfrontamentos políticos”. Ademais, ofreceu que, no caso de que o BNG non se vexa capaz de xestionar a medida, deixe a súa implementación en mans do Partido Popular. “Que paren xa de facer o ridículo e actúen con seriedade polo ben dos composteláns”, salientou.
