A quinta edición do certame Galetiktokers, impulsado polos departamentos de Xuventude e Normalización Lingüística do Concello de Ames, celebrou hoxe, sábado 23 de novembro, a súa gala na Casa da Cultura do Milladoiro. A iniciativa, que busca incentivar a creación de vídeos en galego e visibilizar a comunidade galega de tiktokers, contou con 39 pezas audiovisuais presentadas por arredor de 80 participantes de Ames e doutras localidades como Lugo ou Vilagarcía.
Durante o evento, conducido polos creadores de contido en galego Nuria Grandío (@konachadas) e Rodri Míguez (@rodrimiguez), e amenizado polo rapeiro local Big Meu, entregáronse un total de 1.800 euros en premios. A gala contou coa asistencia do alcalde de Ames, Blas García, tamén concelleiro de Normalización Lingüística, e da concelleira de Mocidade, Carmen Porto, entre outros representantes municipais.
O alcalde, Blas García, subliñou o papel clave da lingua galega na identidade cultural: “Na cultura reside a identidade dos pobos e, sen dúbida, a lingua é ese elemento diferenciador que nos fai únicos. Eu quero que sigamos sendo únicos moitos anos máis: normativo, con gheada, con seseo, con castelanismos… Da igual, pero sempre en galego”. Pola súa banda, Carmen Porto destacou o nivel da participación nesta edición e advertiu sobre a diminución do uso do galego, engadindo: “As administracións debemos darnos conta de que temos ferramentas para mudar o rumbo”.
OS PREMIADOS NO CERTAME
Os premios distribuíronse en dúas categorías de idade:
Na categoría de 13 a 17 anos, resultaron premiadas as pezas Punheta, de Luna Gouvea Diz, Paula Rubianes Miguéns, Irene Abad Señoráns e Xulia Leiro Silva, e Galibrownie, de Lara Bazarra Souto, Candela Calo Romero e Alejandra Fernández Capelo.
Na categoría de 18 a 35 anos, os galardóns recaeron en Mil e un instrumentos, de Miguel Barbazán Lesta, e As princesas tamén falan galego, de Antía López Castro.
O público, que votou a través do perfil de Instagram de Xuventude Ames, concedeu os premios ás pezas Ven falar galego, creada por Sara Briones de la Barrera, Antía Paz Varela, Paula González Sabugueiro e Lucía Rubianes Miguéns, e Fitness da nosa terra, de Diego Vázquez Feijoo e Mario Domínguez Rodríguez.
Cada unha destas obras recibiu un premio de 300 euros.
UNHA PLATAFORMA PARA A XUVENTUDE
A gala consolidouse como un punto de encontro para a mocidade galega interesada na creación audiovisual, demostrando o potencial das novas tecnoloxías para promover e normalizar o uso do galego. Este ano, o certame contou cun xurado composto polos creadores de contido Nuria Grandío e Rodri Míguez, a especialista en comunicación audiovisual Noelia Francisco Lens e, en representación do Concello de Ames, Rosa Moreiras Cuñarro.
