O pasado sábado, Santiago de Compostela sumouse á homenaxe á I Asemblea Nacionalista das Irmandades da Fala mediante o izado da bandeira galega nun acto no que participou a alcaldesa, Goretti Sanmartín, do BNG. Esta conmemoración, promovida pola entidade Vía Galega, forma parte dunha campaña que busca divulgar os símbolos nacionais de Galicia e recordar feitos históricos clave para o nacionalismo galego.
O evento en Santiago foi un dos máis de 170 izados de bandeira realizados en diferentes localidades galegas como parte desta acción, que xa vai pola súa terceira edición. A actividade contou coa lectura de textos de autores galegos como Marica Campo, que creou poemas especialmente para esta ocasión, así como obras de Manuel María e Ramón Cabanillas.
Esta campaña conmemora a I Asemblea Nacionalista, que se celebrou en Lugo os días 17 e 18 de novembro de 1918. Durante aquela reunión histórica, figuras como Castelao, Ramón Cabanillas, Losada Diéguez e Vicente Risco subscribiron un manifesto no que se declaraban nacionalistas, marcando un punto de inflexión na historia política e cultural de Galicia.
