Este luns, Daniel Chapela, até agora coordinador de Cultura do PPdeG e concelleiro no Concello de Bueu, ademais de opinador en Xornal de Compostela anunciou a súa renuncia ao cargo dentro do partido e á súa militancia, mantendo a súa posición como concelleiro independente. A decisión, segundo comunicou, responde a profundas diferenzas co actual equipo da Consellería de Cultura e a discrepancias internas na dirección do grupo municipal do PP en Bueu.
Chapela apuntou que, dende o seu ingreso no equipo, a súa prioridade foi “traballar polo benestar e os intereses da veciñanza”, e que a súa implicación nas áreas de lingua, cultura e política local sempre estivo guiada por un forte compromiso coa xente de Bueu. Non obstante, tras as últimas eleccións autonómicas, declarou sentirse decepcionado coa xestión do equipo que asumiu a Consellería de Cultura, particularmente en materia lingüística, o que definiu como “un piar fundamental para o país e para min”. Entre as causas que o motivan a renunciar, sinalou a postura do conselleiro respecto ao ‘Pacto pola Lingua’, que, na súa opinión, non ofrece “mensaxes esperanzadoras” nun momento decisivo para o futuro do galego.
A súa decisión de desligarse do PP tamén ten a súa orixe en diferenzas dentro do grupo municipal de Bueu, especialmente logo do pleno de xullo. Chapela explicou que, nunha reunión previa ao pleno, manifestara o seu apoio ao voto en contra do estudo para transformar unha zona de aparcadoiro en espazo verde, segundo unha promesa electoral. Porén, no último momento, a súa voceira instou ao grupo a absterse, o que levou a Chapela a romper a disciplina de voto “por lealdade á palabra dada á veciñanza”.
A esta serie de discrepancias engádese a frustración do político coa dinámica de traballo interna do partido, onde sente que se frean “as ideas de calidade” que outros compañeiros propoñen. “Para min, a política non é figurar nas fotos, senón construír”, afirmou, enfatizando a súa visión dunha política que debe servir de ferramenta ao servizo das persoas e non ao contrario.
Chapela conclúe o seu comunicado anunciando a súa renuncia oficial como coordinador de Cultura do PPdeG e á súa militancia no partido, pero confirma que seguirá como concelleiro independente en Bueu para defender os compromisos adquiridos durante a campaña e os valores polos que entrou en política. Agradeceu especialmente o apoio das persoas máis próximas nesta etapa, cuxo respaldo, segundo afirma, foi fundamental para poder dar este paso.
