O líder do Partido Popular en Santiago, Borja Verea, esixiu ao BNG que recupere o servizo de recollida de lixo e restituír os colectores na rúa Costa do Vedor, unha zona onde, segundo o popular, a veciñanza está a padecer as consecuencias desta decisión “arbitraria e discriminatoria”. Verea sinalou que, especialmente as persoas maiores, ven afectadas por esta medida, que implica desprazarse ata 300 metros costa arriba ou abaixo para depositar o lixo, nunha das rúas de maior pendente da cidade.
O popular remarcou que os veciños “levan cinco meses sen un servizo esencial ao que teñen dereito e polo que pagan impostos”. Segundo explicou, a situación é particularmente complicada para os habitantes de maior idade, aos que esta distancia lles supón “un risco e un esforzo innecesario”.
Verea considerou que a decisión do BNG demostra unha “falta de empatía coa veciñanza” e denunciou que este cambio afecta especialmente ás persoas de “70 e 80 anos que non poden retirar o lixo da súa casa”. Ademais, subliñou que a situación supón potenciais riscos de salubridade debido á dificultade que teñen algúns residentes para desfacerse dos residuos regularmente.
Finalmente, Verea cuestionou a falta de alternativas para estas persoas, pedindo ao BNG que rectifique e devolva os colectores de lixo á rúa Costa do Vedor para garantir o acceso ao servizo a toda a veciñanza.
