Este mércores, 6 de novembro, ás 18 horas, o Museo do Pobo Galego abrirá as portas á exposición ‘Palabra e Memoria’, unha iniciativa do IES Perdouro de Burela centrada na normalización da epigrafía funeraria en galego. A exposición, que estará dispoñible ata o 29 de decembro, amosa o labor de documentación realizado polo alumnado do instituto burelao desde 2003, no marco do Modelo Burela de Planificación Lingüística.
A mostra incorpora o traballo fotográfico da xornalista gráfica Pepa Losada, co apoio de María Mon e Aida López, para reflectir a presenza do galego nas lápidas, un ámbito onde a lingua permanecera ausente durante séculos. Esta documentación busca promover o uso do galego para expresar de maneira propia e sentida as emocións de lembranza cara aos seres queridos falecidos.
O proxecto conta coa colaboración da Xunta de Galicia, a Deputación da Coruña, a Deputación de Lugo e o Concello de Santiago de Compostela.
