O Concello de Ames acollerá o domingo, 10 de novembro, un partido solidario no campo municipal de Bertamiráns entre o Bertamiráns FC e o Bastavales UD, co obxectivo de recadar fondos para apoiar á Sociedade Galega de Amigos do Pobo Saharauí (SOGAPS) na súa campaña de emerxencia tras as graves inundacións que asolaron os campamentos de refuxiados saharauís. A iniciativa permitirá destinar a contía recadada pola venda de entradas, ao prezo de 5 euros, á axuda humanitaria en apoio das máis de 600 familias afectadas polas intensas choivas.
A presentación do evento tivo lugar no salón de plenos da Casa do Concello e contou coa participación de Susana Señorís, concelleira de Deportes, Uxía García, concelleira de Benestar Social, Esther Ybarra, representante comarcal de SOGAPS, e Rafael Budiño, presidente do Bertamiráns FC. Segundo explicou Señorís, o obxectivo é mostrar o compromiso de Ames coa solidariedade: “Queremos que Ames continúe amosando o seu carácter solidario, e agradecemos aos clubes do concello a súa colaboración constante en causas que requiren apoio urxente”.
UNHA CAUSA SOLIDARIA PARA UNIR DEPORTE E COMUNIDADE
Uxía García, concelleira de Benestar Social, animou á veciñanza a participar nesta xornada solidaria: “Esta é unha oportunidade para gozar do deporte mentres contribuímos a unha causa solidaria coa que levamos tempo colaborando”. Destacou que SOGAPS e o Concello de Ames xa manteñen un vínculo forte a través de diferentes proxectos solidarios.
Esther Ybarra, en nome de SOGAPS, agradeceu a colaboración do Bertamiráns FC e do Concello de Ames, destacando a disposición de ambos para colaborar con esta causa humanitaria, sinalando que o apoio do club, “que cede unha taquilla enteira dun partido, supón un gran xesto para axudar aos campamentos saharauís nun momento de gran necesidade”.
Ademais do partido, o evento contará con actividades complementarias como a venda de rifas para o sorteo dunha cesta de froita e dunha cea doada polo restaurante Milongas, segundo explicou María Brea, en representación das familias acolledoras do programa Vacacións en Paz.
As doazóns e a recadación do evento serán destinadas á rehabilitación de vivendas e infraestruturas, á subministración de víveres, medicamentos e produtos de primeira necesidade, apoiando así aos habitantes dos campamentos saharauís para que poidan afrontar as necesidades máis urxentes tras os danos sufridos.
