A SD Compostela puxo en marcha a campaña especial “Volver” co obxectivo de que o partido de Copa do Rei contra o Deportivo Alavés, que se disputará o martes 29 de outubro ás 19:00 horas no Vero Boquete, sexa unha auténtica festa do fútbol. A campaña destaca a oportunidade de “volver ilusionarse” e vivir un encontro de Primeira División en Santiago.
A presentación da campaña, celebrada na mañá deste mércores en Área Central, contou coa presenza de Miguel Fernández, xerente do club; Pilar Lueiro, concelleira de Deportes; Sara Castedo, xerente de Área Central; e Pablo Iglesias, xestor comercial de Mahou en Galicia. Segundo Fernández, a venda de entradas está sendo un éxito, con máis de 3.000 xa despachadas, e animou aos abonados a retirar as súas antes do venres 25.
O encontro contará con múltiples accións promocionais, actividades para os máis pequenos, merchandising especial e melloras no estadio, como unha nova iluminación que cumpre cos estándares da Real Federación Española de Fútbol.
