O presidente da Deputación da Coruña, Valentín González Formoso, visitou este xoves Bertamiráns, onde, xunto ao alcalde de Ames, Blas García, e outros representantes institucionais, supervisou as obras de mellora da avenida da Maía. Durante a visita, ambas autoridades asinaron tamén un novo convenio para a creación dunha área de autocaravanas no concello.
O proxecto da nova área de autocaravanas, que estará situada preto do campo da festa da Peregrina, contará cun aparcamento para 15 autocaravanas, unha delas adaptada para persoas con mobilidade reducida. O investimento será de 71.399,30 euros, dos cales o 80% será financiado pola Deputación. “Este convenio permitirá a creación dunha zona máis ampla e mellor xestionada para o crecente número de autocaravanas”, destacou o alcalde Blas García.
MELLORAS EN INFRAESTRUTURAS E PLAN ÚNICO
A visita tamén incluíu a supervisión das obras da avenida da Maía, cun investimento de máis de 300.000 euros. As actuacións, cofinanciadas pola Deputación, centráronse na accesibilidade e mellora das beirarrúas. Durante o seu percorrido, Formoso destacou que a Deputación leva investidos máis de 24 millóns de euros en Ames desde 2016 a través do Plan Único, que permitiu realizar máis de 100 obras no municipio.
Blas García agradeceu a colaboración da Deputación, subliñando que “sen este apoio, moitas das obras que estamos a facer serían imposibles”.
RECUPERACIÓN DO CAMPO DE FÚTBOL DE ORTOÑO
Ademais, as autoridades visitaron o antigo campo de fútbol de Ortoño, agora reconvertido nunha pista multideporte grazas a unha achega de 268.000 euros do Plan Único. Este espazo, destinado a diversas actividades deportivas e educativas, dá nova vida a un dos principais recintos do municipio.
