O BNG de Santiago organiza este venres 18 de outubro a xornada formativa titulada “Vivir sen regras”, co obxectivo de visibilizar e analizar a menopausa desde diferentes ópticas. O evento terá lugar no Centro Sociocultural de Fontiñas, ás 19.30 horas, e contará coa participación de especialistas en diversas disciplinas como a medicina, a psicoloxía e a fisioterapia.
Entre as expertas convidadas están a médica e deputada no Parlamento Galego, Iria Carreira, a matrona María Valiño, a psicóloga Andrea Sieiro e a fisioterapeuta Iria Rei. A xornada ten como obxectivo romper o silencio sobre a menopausa, un tema que, segundo as organizadoras, segue sendo invisibilizado e tratado como un tabú. Carreira subliñou que a menopausa foi historicamente “medicalizada como unha patoloxía cando é unha parte máis da nosa vida que cómpre coñecer e compartir”.
O BNG aposta por sacar esta cuestión ao espazo público, demandando unha maior atención por parte das institucións competentes, especialmente da Xunta de Galicia, para garantir que a saúde das mulleres reciba o foco que merece.
