Os días 6 e 7 de novembro terá lugar unha nova edición do CO(M)XÉNERO Seminario Permanente de Comunicación e Xénero na USC, organizado polo Grupo de Estudos Audiovisuais (GEA). O seminario, que se celebrará no auditorio da Facultade de Ciencias da Comunicación, centrará o seu enfoque no papel das mulleres nos oficios do cinema, explorando a súa versatilidade e capacidade creativa en diversos ámbitos do audiovisual.
A primeira xornada, o mércores 6, contará coa participación de Xaime Varela Sieiro, profesor no IES Arcebispo Xelmírez II de Santiago de Compostela, quen recuperará a figura da sonidista Cruz Risco coa peza ‘Por que marchamos’ (1979). A continuación, intervirá a compositora galega Carme Rodríguez, que abordará a súa experiencia na composición musical para o cinema.
O xoves 7, a profesora e investigadora da Université Paris 3 Sorbonne Nouvelle, Ana Viñuela, centrará a súa intervención no modelo de coprodución francés, poñendo como exemplo a película O que arde (2019). A xornada finalizará coa participación de Pilar Monsell, directora e investigadora na Universitat Pompeu Fabra, quen explicará os seus procesos creativos no cinema de non ficción.
O seminario está aberto ao público xeral, con preferencia para profesionais do audiovisual, investigadores e estudantes das áreas de Comunicación Audiovisual e Xornalismo. As persoas interesadas poden inscribirse ata o 4 de novembro a través dun formulario dispoñible en liña.
