A Asociación Área Empresarial do Tambre (AAET) inaugurará mañá, 7 de outubro, ás 20:00 horas, a exposición titulada “Hormas”, unha mostra de fotografía, pintura e escultura que forma parte da colección ANDANTE, creada polo arquitecto Ramón Álvarez. A exposición estará aberta ao público no Centro Empresarial do Tambre ata o 23 de novembro, con horario de luns a venres de 9:00 a 14:00 e de 16:00 a 20:00 horas. As persoas interesadas en visitala deberán concertar cita previa chamando ao teléfono 981 55 28 50.
A colección ANDANTE xira arredor da horma de zapato, utilizada como elemento integrador en diversas disciplinas artísticas, que van desde a pintura ata a fotografía, a escultura, o debuxo, ou mesmo a danza e a música. Esta iniciativa naceu en 2010 co Ano Santo Xacobeo e mantén a súa esencia de ser unha colección aberta, democrática e atemporal, que continúa medrando grazas á contribución de artistas dispostos a transformar hormas de zapato en pezas de arte.
Na mostra que se presenta en Santiago, poderanse contemplar 35 obras realizadas por artistas principalmente da zona, entre os que destacan nomes como Manuel Quintana Martelo, Masiá, Ramón Conde, Tino Canicoba, Suly Pereira, Lola Sanz, entre outros.
O creador da colección, Ramón Álvarez, é natural de Allariz e en 2017 fundou a Fundación Andante, coa finalidade de promover a arte, a cultura, o deporte e o espírito dos Camiños de Santiago. Grazas ao seu traballo, a colección ANDANTE acadou unha gran proxección, converténdose nun referente na promoción do arte contemporáneo.
