O autor dunha agresión a un home no paseo do río Sarela, en Santiago, foi detido por axentes da Policía Nacional dous días despois por outro altercado ocorrido nas inmediacións da Catedral. Segundo informou o corpo policial, a detención produciuse na tarde do 7 de xullo, cando un equipo da Unidade de Intervención Policial foi requirido por varios cidadáns nas rúas próximas ao templo compostelán.
As persoas que alertaron os axentes advertiron de que un home se atopaba semiespido, amosaba as súas partes íntimas ás persoas que pasaban pola zona e insultaba os viandantes, entre os que había menores de idade. Cando os policías chegaron ao lugar, o home tentou agredilos e, segundo a Policía Nacional, chegou a ameazalos de morte. Ante a súa agresividade, tivo que ser reducido por varios axentes e foi detido como presunto autor dun delito de atentado e resistencia a axentes da autoridade.
INVESTIGADO POLA AGRESIÓN NO SARELA
O home xa estaba a ser investigado pola Brigada de Policía Xudicial pola agresión a outro home no contorno do río Sarela. Estes feitos ocorreron o pasado domingo, cando a vítima paseaba o seu can pola zona. Segundo a investigación, o agora detido golpeouno cunha pedra en distintas partes do corpo e na cabeza. Actualmente, o individuo atópase en prisión. O Xulgado de Instrución número 1 de Santiago decretou o mércores o seu ingreso acusado dun suposto delito de lesións agravadas polo uso dun instrumento perigoso e dun delito de atentado. A investigación continúa aberta para esclarecer todos os feitos relacionados cos dous episodios.
