Unha persoa resultou ferida nun accidente ocorrido na noite deste sábado en Santiago de Compostela, concretamente á altura do número 155 da Avenida de Lugo. Segundo informou o 112 Galicia, un vehículo saíuse da vía e bateu contra outro coche e contra un camión que estaban aparcados.
A central de emerxencias recibiu o aviso arredor das 22.15 horas, cando un particular alertou de que había un condutor ferido. O alertador detallou o ocorrido e engadiu que, debido á colisión, caeu unha árbore sobre outro coche. Ata o lugar desprazouse persoal do Servizo de Urxencias Sanitarias de Galicia-061, os bombeiros de Santiago e axentes da Policía Local. Finalmente, os profesionais sanitarios confirmaron que só unha persoa resultara ferida.
