Unha condutora resultou ferida este sábado tras precipitarse co seu vehículo por un terraplén na estrada DP-0205, ao seu paso polo municipio coruñés de Ames. Segundo informou o 112 Galicia, foron os servizos sanitarios os que avisaron á central de emerxencias deste accidente sobre as 14.30 horas. Na súa comunicación, informaban de que un vehículo caera por un terraplén no quilómetro tres desta vía, na parroquia de Bugallido.
Ata o lugar desprazouse unha dotación de bombeiros do Consorcio contra incendios e salvamento da Coruña con base en Boiro, ademais de membros do GES de Brión, Garda Civil, Protección Civil e Policía Local, que axudaron a saír do vehículo á condutora. Ao parecer, o turismo saíuse da vía pola marxe esquerda e precipitouse polo terraplén ata parar nunhas árbores. A condutora foi atendida no punto e non necesitou ser trasladada.
