A Policía Local de Santiago volverá acudir a centros de secundaria da capital galega para tratar de concienciar ao alumnado das consecuencias que poden ter determinadas condutas incívicas asociadas ao lecer nocturno. Como novidade, tal e como detallaron este luns en rolda de prensa o concelleiro de Mobilidade e Convivencia, Xan Duro, e o policía encargado de impartir as charlas, Martín Camba, nesta edición a iniciativa tamén chegará ás Anpas.
“Eses pais preocupados polo lecer nocturno dos seus fillos, que erros cometen, que riscos hai… A información é fundamental. O ano pasado xa se uniron un par de Anpas e este ano hai cinco centros que van ter esta charla”, especificou Camba. Así mesmo, explicou que estas charlas xurdiron fai tres anos destinadas a alumnado de 1º de bacharelato dun único instituto e “tivo bastante boa acollida”, polo que decidiron estendelas a todos os institutos de secundaria de Santiago, ademais de ao ambiente universitario, sumando tamén residencias e colexios maiores.
Segundo Martín Camba, non se trata só de conversacións sobre normativa, senón que buscan “un diálogo e proximidade” e “concienciar a través de exemplos”. Pola súa banda, Xan Duro destacou que estas charlas están pensadas “para concienciar á mocidade sobre consecuencias de diferentes condutas incívicas”, ademais de tratar de buscar “un lecer nocturno máis saudable e respectuoso”. A iniciativa comezará o próximo día 1 de outubro e desenvolverase ao longo dos próximos meses en todos aqueles centros que o soliciten. O pasado ano, máis de 3.000 alumnos e alumnas da capital galega recibiron estas charlas organizadas pola Policía Local.
