As obras que o Concello de Santiago leva a cabo nas avenidas de Xoán XXXIII e do Burgo das Nacións permitirán sumar dous quilómetros de carril bici, máis prazas de aparcadoiro para residentes e un viario cun tráfico “máis pacificado”. Así o anunciaron este luns os concelleiros de Mobilidade, Xan Duro, e Obras, Xesús Domínguez, en rolda de prensa.
Tal e como explicaron, o obxectivo é “avanzar nun modelo de mobilidade máis sustentable, con máis espazo para os peóns e para a bicicleta, e máis seguro para os viandantes”. A actuación que xa está en marcha suporá a supresión de dous carrís de circulación na avenida de Xoán XXIII, á que se lle dará tratamento de vía urbana con límite de circulación de 30 quilómetros/hora.
Así, apuntaron, gáñase espazo para acondicionar o seu respectivo carril bici de subida e de baixada a ambos os dous lados da calzada. Ese carril bici terá continuidade pola avenida do Burgo das Nacións ata entroncar coa avenida de Castelao, en Vite. Seguindo cara a San Caetano, acondicionarase unha senda que atrevese o parque Pablo Iglesias e Branco Amor, que chegará ata a senda xa existente na rúa dos Irmandiños que vai dar ao aparcadoiro disuasorio de Salgueiriños.
Ademais, avanzaron que a previsión é comunicar tamén o carril bici co que xa está sinalizado en Cancelas e coa futura senda ciclable que constrúe a Xunta desde Milladoiro. En total, con esta actuación Santiago gañará dous quilómetros de carril bici. “O obxectivo é fomentar os modos brandos de transporte, facer de Compostela unha cidade máis amable coa bicicleta e facilitar a convivencia da bici con outros vehículos, tal e como se está facendo noutras actuacións”, defendeu Xan Duro.
MÁIS APARCADOIRO PARA RESIDENTES
Doutra banda, a supresión de carrís de circulación en Xoán XXIII tamén permitirá acondicionar máis prazas de aparcadoiro. Así, das 23 actuais pasarase a 70, todas para residentes. O responsable de mobilidade comentou que con esta reserva, pretenden atender á poboación da zona e evitar o tráfico ‘parásito’, que é aquel que se move buscando unicamente un lugar para aparcar.
A actuación contempla, ademais, a elevación dos pasos de peóns existentes para “mellorar a seguridade para os peóns, que xa non terán que atravesar catro carrís, de mellorar a accesibilidade e de facer cumprir os límites de velocidade”. A este respecto, incidiron en que Xoán XXIII está “sobredimensionado”, polo que consideran “moi positivo” reducir os catro carrís de circulación a só dous.
A reforma de Xoan XXIII suporá un investimento duns 70.000 euros, entre obra civil e o pintado e sinalización. “Non é unha obra illada da acción de goberno, senón que forma parte dun proxecto global no que se estudará a viabilidade de estendelo a outras rúas de similares características”, avanzou o concelleiro de obras.
