Decenas de vítimas e familiares do accidente do tren Alvia en Santiago –do cal este mércores, 24 de xullo, cúmprense 11 anos-– marchan polas rúas compostelás para reclamar á xuíza do caso que sexa “valente” e que a sentenza que emita, que cren que será “inminente”, sexa “exemplar”.
Ao comezo da protesta, ante a estación de tren da capital galega antes de partir cara á Praza do Obradoiro, o presidente da Plataforma Vítimas Alvia 04155, Jesús Domínguez, lembrou que levan case un ano á espera desa sentenza tras o fin do xuízo o 27 de xullo de 2023, despois do décimo aniversario deste sinistro que deixou 80 mortos e 145 feridos.
Ese fallo “exemplar”, en palabras de Domínguez, pasa por unha condena a Andrés Cortabitarte, exresponsable de seguridade de Adif, empresa pública encargada das infraestruturas ferroviarias, porque “autorizou a desconexión do sistema de seguridade que evitase o accidente”.
Cortabitarte e o maquinista, Francisco Garzón, son os dous únicos imputados por 80 delitos de homicidio e 145 de lesións por imprudencia profesional grave. A piques de cumprirse un ano desde a conclusión do xuízo, as vítimas esperan unha sentenza “inminente”, quizá “a semana que vén”. O presidente da plataforma considera que, de ser así, será “unha vez máis” coa intención de “tapar” a súa voz.
