O conselleiro de Sanidade, Antonio Gómez Caamaño, visitou este xoves a Asociación de Dano Cerebral de Compostela, Sarela, onde reivindicou o seu labor e a de todo o tecido asociativo, xunto co apoio da Xunta ao sector sociosanitario con 1,2 millóns de euros en 2024. Gómez Caamaño, acompañado do xerente da área Sanitaria de Santiago, Anxo Facio, foi recibido neste acto polo presidente de Sarela, José Balboa, pola súa directora, Rocío García, e polo presidente da Federación de Dano Cerebral de Galicia, Luciano Fernández.
O titular de Sanidade subliñou a importancia de que o sistema público conte cun proceso asistencial integrado (PAI) destinado a atender as necesidades específicas de pacientes con dano cerebral e os seus coidadores. O conselleiro agradeceu a invitación e o traballo de todos quen traballan e colaboran en Sarela: “É un exemplo de moitísimo nivel de como en política sociosanitaria pódense facer grandes cousas como os pacientes”.
Segundo informa a Xunta, a asociación presta atención na área de Santiago e está conformada por máis de 800 persoas entre socios, colaboradores voluntarios e profesionais. Desde hai anos, o Goberno galego colabora con esta entidade con programas de atención fisioterapéutica para fomentar a autonomía dos pacientes e previr a súa deterioración.
