Un grupo de sanitarios e familiares procedentes de Córdoba chegaron este mércores a Santiago de Compostela tras levar case dous meses percorrendo, por etapas, o Camiño de Santiago en bicicleta para concienciar sobre a investigación do cancro infantil. Pasadas as 18:00 horas, o grupo foi recibido polo director de Turismo de Galicia, Xosé Merelles, e o xerente da Axencia Galega de Coñecemento en Saúde, Antonio Fernández-Campa, na Praza do Obradoiro.

O proxecto, ‘Quilómetros de esperanza’, arrincou hai algo máis de dous meses da man de Nicolás, sanitario no Hospital Reina Sofía de Córdoba, en oncoloxía pediátrica, e de Javier, pai dun paciente afectado. A campaña busca non só visibilizar a “necesidade” de investigar o cancro infantil, senón tamén recadar fondos para iso. Por iso, na súa conta de Instagram (@kilometros_de_esperanza), habilitaron unha ligazón para que todos aqueles que o desexen, poidan facer doazóns. Precisamente a través desta conta van actualizando as súas “aventuras” polo Camiño de Santiago e compartindo algunhas das mensaxes de apoio que recibían, como os dos internacionais de fútbol Santi Cazorla ou Lucía García.