A alcaldesa de Santiago, Goretti Sanmartín, negou este xoves en rolda de prensa que vaia a haber “novidades” proximamente sobre a demolición da Casa da Xuventude. Segundo explicou, o Concello trasladoulle á Deputación “en tempo e forma” que o uso dese espazo para servizos administrativos da Deputación “decaía” ao non asinarse o convenio. Agora, apuntou, continúan na fase de estudo e reflexión, sen que vaia a haber novidades respecto diso nun horizonte próximo. Con todo, si recoñeceu que seguen coa idea que levaban en campaña, demoler a edificación.
O PSOE, CRÍTICO
Pola súa banda, a socialista Mercedes Rosón asegurou que “as pelexas internas do bipartito están a custarlle diñeiro ao Concello”. A que foi responsable de Urbanismo durante o pasado mandato afeoulle ao goberno municipal que “botasen a perder” a axuda da entidade provincial “á espera de que unha convenza á outra de derrubar ou manter” un equipamento público que, desde as filas socialistas, cualifican como “estratéxico” para a dinamización da contorna da cidade histórica.
“Trátase dun edificio que, aínda que errado no seu envolvente, ten moito potencial para o uso do tecido asociativo e como espazo para a promoción de actividades culturais”, defendeu Rosón. Sinala Rosón que esta decisión “nin resolve a cuestión do parque de bombeiros nin responde o futuro do edificio da Praza do Matadoiro”.
A este respecto, alertan que o proxecto “estaría en conflito cunha posible localización nese mesmo espazo do parque comarcal de bombeiros para o que, de momento, tampouco hai alternativa”. “Isto cando nun prazo de dous ou tres anos, as obras de ampliación do edificio administrativo de San Caetano obrigarán a desaloxar as actuais dependencias dos bombeiros do municipio”, insisten.
