A Universidade de Santiago de Compostela (USC) recibiu en comodato 13 obras do pintor José María Fenollera e Ibáñez, que pasarán a formar parte do patrimonio artístico exposto na Facultade de Xeografía e Historia. As pezas estarán situadas nas aulas 12, 13 e 15, así como no despacho do decano da Facultade. A entrega formal tivo lugar no Paraninfo da USC, nun acto no que a vicerreitora de Cultura, Lingua e Patrimonio, Ana Cabana, destacou a estreita relación entre a historia do edificio e a figura de Fenollera.
Segundo lembrou, o artista naceu en Valencia e chegou a Santiago en 1886, cidade na que acabou establecendo a súa residencia permanente e na que deixou unha fonda pegada. Cabana salientou tanto a súa vinculación coa Real Sociedade Económica de Amigos do País como o peso da súa obra dentro do patrimonio universitario.
UN RETRATISTA FUNDAMENTAL NO PATRIMONIO DA USC
A vicerreitora definiu Fenollera como un “extraordinario retratista e pintor de tipos e escenas de costumes”, características que tamén están presentes nas 13 obras agora cedidas á Universidade. A cesión formalizouse mediante un comodato coa familia Fenollera, polo que as pezas pasan temporalmente á USC sen perder a súa titularidade orixinal. “A cesión temporal deste legado, sen dúbida, enriquecerá os fondos do patrimonio histórico-artístico da Universidade”, destacou Ana Cabana. A incorporación destas obras permitirá así ampliar a presenza de Fenollera no espazo universitario e reforzar a relación histórica entre a súa produción artística e a propia USC.
