A Federación de ANPA de Compostela emitiu este luns un comunicado no que rexeita as acusacións de “politización” lanzadas contra a ANPA Athenea e reafirma o seu apoio ás familias do CEIP Quiroga Palacios, que, segundo lembra, “levan anos reclamando unha ampliación acorde co aumento do alumnado do centro e coas súas necesidades educativas”. A Federación subliña que a ANPA Athenea leva tempo demandando a ampliación do colexio ante o incremento do alumnado, o crecemento da zona da cidade na que se atopa e as condicións nas que se desenvolve o ensino no centro.
MÁIS ESPAZO PARA ATENDER AS NECESIDADES DO ALUMNADO
As familias reclaman instalacións suficientes e adecuadas para garantir a inclusión educativa, a atención individualizada e o correcto desenvolvemento do alumnado. “As familias esixen espazos suficientes e en boas condicións para que sexa posible a inclusión educativa de todo o alumnado, a atención individualizada, o desenvolvemento motor, relacional e social de todos e todas”, sinala o comunicado. Engaden que estas necesidades deben ser atendidas tendo en conta tanto o momento evolutivo dos nenos e nenas como as condicións climáticas e meteorolóxicas.
A XUNTA COMPROMETE UN NOVO EDIFICIO DE INFANTIL
Tras anos de reclamacións, a Federación lembra que a Consellería de Educación se comprometeu finalmente coa ampliación do CEIP Quiroga Palacios. Porén, o proxecto anunciado contempla unicamente a construción dun edificio destinado a Educación Infantil, malia que, segundo as familias, o centro dispón de terreo para desenvolver outras actuacións. Por este motivo, a ANPA Athenea e FANPA Compostela reclaman que a intervención “non fique nunha actuación parcial” e permita dar resposta ao resto das carencias de espazo que presenta o colexio.
CRÍTICAS AO PP DE SANTIAGO
A Federación lamenta ademais que a súa reivindicación non conte co respaldo de todos os grupos políticos municipais. En concreto, critica que o PP compostelán interprete a posición da ANPA como unha actuación partidista. “Lamentamos que esta reclamación non sexa apoiada por todos os grupos políticos municipais, e máis aínda que a defensa dos intereses da comunidade educativa do Quiroga Palacios sexa interpretada como politizada e partidista polo PP compostelán”, sinala o comunicado. A Federación cuestiona que, ao mesmo tempo, non se poña en dúbida a decisión da Consellería e defende que a ANPA se limita a describir e reclamar solucións para as necesidades existentes no centro educativo.
