A estatua de Moncho Reboiras, que o Concello de Santiago situou na rúa Carreira do Conde en Santiago, volveu a aparecer vandalizada. A escultura, que xa foi obxecto dun ataque o pasado mes de maio, cando foi cuberta de pintura vermella, sufriu este luns un novo acto vandálico con pintura de cor azul turquesa.
A portavoz de goberno local, Míriam Louzao, denunciou esta situación e sinalou, a preguntas dos medios de comunicación tras unha rolda de prensa este luns, que “é bastante dramático que volva suceder isto”. Así mesmo, Louzao fixo un chamamento á cidadanía para que “respecte absolutamente todo o patrimonio” e volveu a condenar estes feitos, que “non poden ter cabida nunha sociedade como esta”.
