HomeSOCIEDADEGoretti Sanmartín e o Foro Cívico debaten sobre o novo modelo turístico:...

Goretti Sanmartín e o Foro Cívico debaten sobre o novo modelo turístico: “Os visitantes deben saír da améndoa histórica”

Repasaron os asuntos "de maior interese" para a cidade, como a parcela de Peleteiro, o orbital ou o aparcadoiro do CHUS.

Publicado o

Por Xornal de Compostela

A alcaldesa de Santiago, Goretti Sanmartín, xunto con parte do seu equipo, mantivo este luns un encontro con representantes do Foro Cívico, con quen tratou os asuntos “de maior interese” para a cidade, como o novo modelo turístico, a necesidade de vivenda e chan industrial, ou a situación de infraestruturas como o orbital, o aparcadoiro do CHUS, a intermodal ou a parcela de Peleteiro.

Segundo dixo en declaracións aos medios tras o encontro, na reunión falouse sobre a evolución de infraestruturas como o aparcadoiro do Hospital Clínico, tras o principio de acordo alcanzado a semana pasada coa Xunta, e a EDAR, que o consistorio confía en que “sexa unha realidade” para mediados de 2026. Ademais, tratouse tamén a finalización, prevista para este ano, das obras da Intermodal, tras o que arrincaría, o próximo, a licitación do aparcadoiro; e as obras da ligazón ‘orbital’ que, tras sufrir estes meses “un atraso”, a alcaldesa confía en que estea concluído “á volta do verán”.

Goretti Sanmartín trasladou ao Foro Cívico as últimas novidades sobre os usos da parcela de Peleteiro, para a que este venres reclamarán a intervención do Goberno central, e os proxectos do concello en relación á vivenda, “un dos problemas que máis preocupan”. A alcaldesa informoulles da creación da empresa municipal de vivenda pública, que se dedicará tanto á recuperación e rehabilitación como a instar á Xunta a que se constrúa vivenda pública na cidade, para o que o goberno local está disposto a ceder unha parcela.

No campo da vivenda, a rexedora sinalou que o Foro Cívico reclama “máis colaboración” coa universidade en aspectos como as residencias universitarias e a urbanización do campus sur; ademais de “máis chan industrial” e un abaratamento do seu prezo, algo que, lembrou, non depende directamente o Concello, aínda que “darán traslado”. No marco do encontro, os asistentes falaron “da necesidade de que haxa residencias da terceira idade e centros de día” en Santiago, dixo Goretti Sanmartín, que puxo a disposición da Xunta unha parcela en Fontiñas para este fin.

CHAN INDUSTRIAL

O portavoz do Foro Cívico, Carlos García Cumplido, sinalou que unha “materia básica” que ten pendente Santiago, ademais da relativa á vivenda, é o desenvolvemento de chan industrial. Con iso, pediu “un esforzo” ao concello para que “toquen a campaña” da Xunta e trasladen esta petición a quen ten as competencias para que Santiago “teña chan industrial e teña vivenda tanto pública como non pública”.

Ademais, García Cumprido reiterou a necesidade de que “os estudantes teñan vivendas adecuadas e a un prezo razoable” para que a “universidade siga sendo atractiva”. En cuestións como a leira de Peleteiro, destacou a necesidade de facer unha “fronte común” e da unanimidade nas reclamacións para lograr pasos adiante, como no caso do parking do CHUS.

NOVO MODELO DE TURISMO

Finalmente, outro dos grandes temas que se abordaron no encontro é o relativo ao ámbito turístico e a necesidade de pór en marcha un “novo modelo”, como dixo Goretti Sanmartín. “Falamos da necesidade de modificar o modelo de turismo e de ir cara a un modelo de calidade, de apostar por rutas internacionais e de facer o traballo en materia de desestacionalización e tamén que a xente non se mova sempre polos mesmos lugares en Santiago”, afirmou a rexedora.

Sobre esta cuestión, Carlos García Cumplido apuntou que en materia de turismo “o número é importante, pero non suficiente” e instou a “mellorar a rendibilidade do turismo” en “dous aspectos”: “o económico para a cidade e o de satisfacción para o visitante”. “Isto require que traballemos o turismo organizando os fluxos turísticos, mesmo non só na chegada, se non en como se vive a cidade”, apuntou o portavoz do Foro Cívico. Para todo iso, lembrou, necesítanse “recursos”, polo que non rexeitan “que pode haber necesidade dunha taxa turística”.

En todo caso, destacou que a cidade “ten moito que ofrecer” e lamentou que os viaxeiros “só a están visitando moi parcialmente e “saturando unha zona concreta”. “Necesitamos mover ese fluxo turístico, mover esa xente ao longo do ano e tamén ao longo da cidade”, apostilou. Como exemplo, García Cumplido lembrou que hai “pouca xente” que sala da améndoa da cidade histórica para visitar un monumento como a Colexiata de Sar. “É normal: eu veño a Santiago porque hai unha Catedral, hai unha universidade, hai un Hostal dos Reis Católicos, hai un Camiño de Santiago, iso é o que me chama”, dixo o portavoz do Foro, apostando por informar os cidadáns doutras posibilidades.

Neste aspecto de “organizar o turismo” é no que o Foro considera que hai “moito que conseguir”, polo que apostou por “mirar a outras cidades do mundo que xa deron pasos neste sentido”. “Eu estou convencido de que, se empezamos a traballar, no próximo Xacobeo teremos, polo menos o mesmo número de visitantes ou máis que o anterior, pero, sobre todo, teremos un turismo moito máis rendible”, finalizou.

ÚLTIMAS

Sanmartín destaca o diálogo de Xunta e Goberno para o traslado de migrantes e reitera: “Santiago é acolledora”

A alcaldesa de Santiago, Goretti Sanmartín, celebrou o acordo entre a Xunta e o...

Como en anteriores ocasións, Feijóo estará o 25 de xullo na Ofrenda do Apóstolo

O líder do Partido Popular, Alberto Núñez Feijóo, participará o próximo 25 de xullo, Día de...

Nove citas musicais imperdibles no Outono Códax Festival

O Outono Códax Festival quenta motorores para a súa próxima edición, cun cartel que contará con...

O aluguer é o que máis tensiona o mercado da vivenda, segundo un estudo encargado polo Concello

O concelleiro de Urbanismo de Santiago, Iago Lestegás, informou este venres no pleno da...

Sanmartín destaca o diálogo de Xunta e Goberno para o traslado de migrantes e reitera: “Santiago é acolledora”

A alcaldesa de Santiago, Goretti Sanmartín, celebrou o acordo entre a Xunta e o...

O aluguer é o que máis tensiona o mercado da vivenda, segundo un estudo encargado polo Concello

O concelleiro de Urbanismo de Santiago, Iago Lestegás, informou este venres no pleno da...

A Xunta abre o prazo para que as prazas de abastos opten a axudas co selo Mercados Excelentes

O Diario Oficial de Galicia (DOG) anunciou este venres a publicación dunha nova orde...