A Asociación de Pacientes e Usuarios do CHUS (Complexo Hospitalario Universitario de Santiago) amosou o seu “escepticismo” ante o escrito emitido pola Valedora do Pobo no que resolve a queixa presentada pola asociación e outras oito entidades en relación ao sistema de axendas dinámicas, coñecido como ‘caixa de correos de pacientes’. No escrito, o organismo deixa constancia por escrito do compromiso verbal realizado pola Consellería de Sanidade na reunión mantida o 4 de novembro de que procederán a revisar o sistema.
“A nosa experiencia como pacientes e usuarios do Sergas fai que conservemos unha alta dose de escepticismo, alimentado nestes 11 anos de existencia co reiterado caso omiso que desde os órganos directivos se fai das denuncias, e tendo en conta que levan cinco xestionando as axendas á marxe da legalidade“, lamentan. Así as cousas, destacan que, agora, se o departamento autonómico non rectifica, non desatende unicamente a petición da asociación, senón que “faltará a un compromiso adquirido coa institución da Valedora do Pobo”. Nesta liña, avanzan que se non se produce a rectificación, estudarán e proporán ao resto de entidades as medidas “que se considere oportuno tomar no futuro”.
