O avance nas obras de prolongación da autovía Santiago-A Estrada (AG-59) fará necesaria a afección ao tráfico na estrada AC-241, en Teo, a partir do próximo martes. Segundo informou a Xunta, a afección será no punto quilométrico 13+250 da AC-241, en Vilar, no concello de Teo, para a execución das cruces de estrada necesarias para a dotación de drenaxe e a reposición de servizos afectados de baixa tensión e telefonía.
O desvío comezará o vindeiro martes ás 07.00 horas co corte do carril dereito en sentido Pontevea, permitíndose o tráfico alternativo regulado con semáforos mentres se executan os traballos. A xornada posterior será necesaria para o curado da laxa de formigón. O 19 de xuño ás 07.00 horas trasladarase o corte ao carril esquerdo, permitíndose de igual modo o tráfico alternativo regulado con semáforos. Os traballos levaranse a cabo durante o día e manterase o corte durante 24 horas para o curado do formigón. Segundo a planificación dos traballos, prevese a finalización do desvío o 20 de xuño ás 19.00 horas, restablecendo a circulación con normalidade.
