Un grupo de familias do Colexio Trisquel Compostela International volveron denunciar este luns a situación de “desamparo” que viven ante as “reiteradas” incidencias “e ata ilegalidades” provocadas polas irrupcións que refuxiados nun recinto anexo realizan na área limitada para o colexio. Hai semanas que as familias denuncian esta conxuntura, pedindo a intervención das autoridades. Ante a falta de resposta, advirten de que estudarán accións legais se a situación continúa sen resolverse.
A comunidade escolar apunta directamente aos representantes da propiedade das instalacións, a Fundación Junior’s, que ten en vigor contratos con outras empresas –ademais do colexio– como d’Lecer. Esta última e Trisquel comparten instalacións do antigo colexio Junior’s. Segundo relatan, o pasado mes de setembro de 2024, a empresa d’Lecer contratou os servizos de aloxamento á ONG Rescate para acoller nas instalacións anexas ao colexio a un número aproximado de 120 homes adultos refuxiados.
Critican que coñeceron esta circunstancia pola prensa a dous días de iniciar o curso, “xa que non foi comunicada por ninguén ao centro”. Naquel momento, apuntan, indicóuselles que sería unha medida de acollida temporal. “O noso colexio, sensibilizado co fenómeno actual das migracións, adaptou a súa programación para dedicar todo o primeiro trimestre a traballos relativos ao tema das migracións de cara a dar a coñecer e sensibilizar aos alumnos con esta problemática”, destacan.
DANOS NO RECINTO E BROTE DE TUBERCULOSE
Os problemas, relatan, comezan cando as entidades sinaladas realizan diversas accións que “minan as relacións de convivencia”. Concretamente, citan a colocación de cámaras de vixilancia nas instalacións sen permisos parentais; a ONG Rescate e d’Lecer circulan con automóbiles polas instalacións de recreo do alumnado e ocupan espazos destinados por contrato ao colexio.
Comentan tamén que a empresa d’Lecer dá aloxamento a un grupo de traballadores en varias das pequenas cabanas, destinadas nun principio a intercambios escolares e campamentos, e que durante a súa estancia unha das cabanas ardeu complemente. A consecuencia disto, prodúcense diversos danos nalgunhas das instalacións destinadas a Trisquel, así como a caída de parte do muro perimetral, quedando así todo o recinto sen a preceptiva perimetración dunha instalación escolar. “Danos, todos eles que, a día de hoxe, non se arranxaron fóra daqueles que o propio colexio asumiu para garantir a seguridade do alumnado e a continuidade do seu labor docente”, critican.
Ademais, sinalan que se lle asignan á ONG aulas e espazos para diversas actividades da comunidade refuxiada que lindan coas do colexio, “obrigando a compartir accesos entre o alumnado do colexio e a comunidade refuxiada”. Aseguran que todo isto leva que os adultos “deambulen constantemente” polo recinto escolar, “incumprindo as normas, tanto ministeriais como autonómicas, que prohiben a presenza de calquera adulto que non pertenza ao equipo laboral do colexio no devandito recinto”.
Un dos momentos máis tensos foi o brote de tuberculose que se rexistrou entre a comunidade refuxiada, que censuran que non foi comunicado ao centro e, “con toda probabilidade, como consecuencia do mesmo, producíronse contaxios na comunidade escolar, tanto a alumnos como a docentes”. “Para coroar este rosario de despropósitos, hai escasos días producíronse dous enfrontamentos entre o xestor da empresa d’Lecer e unha docente, e o representante da propiedade con outra docente. Neste último caso presentouse denuncia ante a Policía Nacional”, relatan.
DIRÍXENSE A CONCELLO, XUNTA E GOBERNO
Ante esta situación, solicitan ao Concello de Santiago que inspeccione as licenzas de actividade da empresa d’Lecer e comprobe se cumpren todos os requisitos legais para o desenvolvemento das actividades que anuncia. Ás consellerías de Medio Rural, Educación, Política Social e Sanidade, que velen polo cumprimento da normativa urbanística (APLU), da normativa relativa a espazos educativos e o seu necesario illamento da poboación adulta, a protexer a integridade dos menores, e a ofrecer seguridade sanitaria á comunidade educativa.
Así mesmo, á Oficina de Asilo e Refuxio do Ministerio do Interior do Goberno e ao Ministerio de Inclusión, Seguridade Social e Migracións, o seu concurso neste tema para dar un aloxamento “en instalacións dignas” á comunidade refuxiada en espazos compatibles”. Fan tamén unha petición expresa ao Banco de Santander, propietario último das instalacións, para que revise e limite as actuacións do representante legal da propiedade ou proceda, “se así o ve adecuado”, á súa substitución.
