O Concello de Santiago prevé que o imposto sobre estancias turísticas, coñecido como taxa turística, empece a funcionar este verán. Así o confirmaron este venres a concelleira de Turismo, Míriam Louzao, e o concelleiro de Economía e Facenda, Manuel César Vila, tras reunirse con representantes de asociacións empresariais, colectivos profesionais, partidos políticos, sindicatos e asociacións culturais e veciñais.
Neste sentido, Louzao destacou que foi unha reunión “moi produtiva e moi necesaria” e aproveitou para avanzar que a intención do Concello é facer realidade esta recarga “canto antes” e que están a traballar coa previsión de tela operativa este verán. Segundo explicaron ambos os concelleiros, as entidades puideron coñecer de primeira man o borrador da Ordenanza fiscal reguladora da recarga municipal sobre o imposto autonómico ás estancias turísticas e os principais criterios para crear o Foro de Turismo Sustentable, que será o novo órgano de participación e gobernación en materia turística.
A continuación, detallaron que o obxectivo desta reunión era recoller opinións e suxestións das entidades, que se centraron principalmente en cuestións relacionados coa forma de cobro da recarga por parte dos establecementos de aloxamento turístico e co destino dos fondos recadados e a súa repercusión para os veciños e para o sector. Pola súa banda, o responsable de Facenda do Concello subliñou que o documento presentado este venres “está xa moi traballado”, polo que asegurou que “en canto finalice o período de consulta previa e se incorporen as suxestións que procedan”, continuarase co procedemento para levar a ordenanza a aprobación plenaria.
RECADACIÓN
Sobre a recadación, o concelleiro de Facenda lembrou que, segundo recollen os orzamentos de 2025, a previsión é de 2,6 millóns de euros. “O que queremos co recadado é equilibrar a diferenza que hai entre os gastos que ten un Concello pequeno como Compostela con eses gastos que provoca o impacto que ten a cantidade de persoas que nos visitan en relación ao número de persoas que habitan Compostela“, sinalou Louzao. Neste contexto, ante as preguntas dos medios, a concelleira explicou o destino da recadación e asegurou que o Concello decidirá en que se investirá o 20 %, mentres que o 80 % restante acordarase co sector.
FORO DE TURISMO SUSTENTABLE
En relación á creación do Foro de Turismo Sustentable, Louzao explicou que se concibe como un “espazo de diálogo, colaboración e asesoramento da política turística municipal en xeral”, entre cuxas funcións explicou que se incluirán aquelas relativas ao destino da recarga municipal sobre o imposto. Este Foro incrementará o número de membros –respecto ao Consello Municipal de Turismo– e variará as funcións e a periodicidade para formar un foro “estable, cun funcionamento regulado e con carácter consultivo”. Con todo, Louzao lembrou que tanto para a ordenanza fiscal como o Foro de Turismo estarán abertas as consultas previas no portal web do Concello ata o día 7 de abril.
