O pleno de Santiago aprobou por unanimidade a declaración conxunta a través da que os grupos municipais reiteraron a necesidade de dotar á cidade dun xulgado exclusivo de violencia contra as mulleres “sen que isto signifique que se prescinda de ningún outro instrumento xudicial e sen que se elimine ningún outro xulgado de instrución”.
No documento sinálase que “tanto a evolución do número de denuncias por violencia machista como as recomendacións para o tratamento especializado destes casos, xustificaron a reclamación dun xulgado específico sobre violencia de xénero en Santiago de Compostela, que foi apoiada pola unanimidade do pleno o 25 de marzo de 2021”.
A declaración fundamenta esta demanda tanto na Lei orgánica 1/2004, do 28 de decembro, de medidas de protección integral contra a violencia de xénero, que alude ao obxectivo de especializar o tratamento de denuncias por violencia machista, como no Pacto de Estado contra a violencia de xénero que sinala a “necesidade de reforzar a especialización no ámbito procesual intermedio, xulgados do penal, que son os que atenden un maior número de casos de violencia machista”.
Tamén se lembra que a Sala de Goberno do Tribunal Superior de Xustiza de Galicia, na súa reunión do 24 de xaneiro de 2024 acordou solicitar a creación de novas unidades xudiciais sobre as mulleres de Santiago de Compostela. Esta resolución trae causa tamén do acordo da comisión mixta do día 30 de maio de 2024 entre o Tribunal Superior de Galicia e a Xunta de Galicia.
