A sección compostelá da Audiencia Provincial da Coruña acollerá desde o vindeiro luns, día 20, un xuízo por tráfico de drogas no que figuran como acusados ata 28 persoas que formaron unha armazón para distribuír e vender cocaína e heroína na cidade. Segundo recolle o escrito de cualificación fiscal, desde polo menos xaneiro de 2020 e ata o momento da detención de cada un dos acusados, os mesmos dedicáronse, na cidade de Santiago, á distribución e venda entre terceiras persoas de sustancias estupefacientes, concretamente heroína e cocaína. Cada un dos acusados tiña uns labores asignados, desde facerse coa droga a repartila ou vendela ao consumidor final en distintos pisos da cidade.
O Ministerio Púbico considera os feitos constitutivos dun delito de tráfico de sustancias estupefacientes. Ademais, a un dos procesados atribúelle un delito de atentado e un delito leve de lesións, dado que agrediu a un dos axentes que o detiñan. Por iso, pide para os acusados penas que van dos catro aos seis anos de cárcere, ademais do pago de multas. Para o acusado de agredir a un axente, o fiscal solicita que a pena de cárcere poida conmutarse por expulsión do territorio nacional durante 10 anos, dado que se atopa en España en situación irregular.
