A Xunta trasladou este martes ao Concello de Santiago o informe favorable para ampliar ata 173 as licenzas de taxi no municipio, como solicitara Raxoi, o que suporía ampliar en 29 as 144 licenzas actuais. Segundo explicou o Goberno galego nunha nota de prensa, 15 das novas incorporacións corresponden a licenzas para aqueles taxis que están adaptados a persoas con mobilidade reducida, que se sumarán ás 10 licenzas actuais. Así mesmo, Raxoi terá un prazo de dous meses para fixar o calendario para outorgar as novas prazas de taxi, que poderían ser concedidas todas elas de forma simultánea, segundo detallou nunha o goberno local.
No caso de Santiago, o informe recolle que se considera “suficientemente acreditado” un aumento da demanda que estaría vinculado, “entre outros motivos”, a un incremento de residentes, de turistas, de peregrinos, así como da mobilidade cara a e desde Compostela en transporte público, ademais dos desprazamentos a municipios limítrofes. Con todo, a Administración autonómica sinalou que o estudo de mobilidade do Concello compostelán “xustifica” o nivel de oferta e demanda de servizos de taxi existentes, a cobertura por transporte público ou as necesidades de mobilidade da poboación, entre outras.
Por outra banda, o concelleiro de Mobilidade, Convivencia e Centros Socioculturais do Concello de Santiago, Xan Duro, aproveitou para lembrar que “esta foi a primeira solicitude, avalada por un informe rigoroso, de incremento de licenzas desde 1998, a pesar de ter menos taxis operativos que fai dez anos para atender a unha poboación e unha presión turística moito maior”. Con todo, o goberno local mostrouse “satisfeito” coa noticia e sinalou que o Concello traballará agora para que estas licenzas sexan “canto antes” unha realidade, xa que é unha “demanda clara” dos veciños de Compostela.
