A maxistrada Sandra María Igrexas Barral foi elixida este xoves como nova xuíza decana de Santiago de Compostela, tras unha votación unánime na Xunta Xeral Extraordinaria de Xuíces. Igrexas, que comezou a súa carreira xudicial en 2009, actualmente exerce no Xulgado de Primeira Instancia número 4 de Santiago e conta cunha ampla experiencia en diversas xurisdicións.
A maxistrada Igrexas enfronta o novo mandato coa vontade de defender os intereses dos xulgados composteláns e atender ás necesidades específicas das súas xuízas e xuíces. Entre as súas prioridades figura o incremento da planta xudicial, co establecemento dun xulgado exclusivo de Violencia sobre a Muller e dun Xulgado Contencioso-administrativo. Tamén busca reforzar a xurisdición civil, incluído o Xulgado de Familia, para mellorar a resposta xudicial ante a crecente demanda de servizos en Santiago.
Na súa proposta inclúe, ademais, melloras nos espazos destinados a persoas que precisan atención especial, o avance na dixitalización das salas, seguindo o Plan SENDA de modernización, e a creación de solucións á escaseza de aparcadoiros próximos ás instalacións xudiciais.
Igrexas comprométese a “escoitar todas as voces implicadas e buscar fórmulas efectivas para expresar as necesidades” da comunidade xudicial compostelá. O seu nomeamento como decana require a ratificación do Consello Xeral do Poder Xudicial e a súa posterior publicación no BOE. Este cambio de liderado sucede a Andrés Lago Louro, recentemente nomeado presidente do Consello Consultivo de Galicia, e supón un novo impulso para a xustiza en Santiago.
