Catro persoas resultaron feridas tras un accidente de tráfico ocorrido na AP-53, en San Mamede de Ribadulla, no municipio de Vedra. O sinistro tivo lugar arredor das 14:00 horas deste domingo e foi notificado ao 112 a través do sistema de e-call do vehículo implicado, así como por varios particulares que alertaron das consecuencias do accidente.
A central de emerxencias activou un dispositivo de resposta que incluiu ao Servizo de Urxencias Sanitarias de Galicia, aos Bombeiros de Ordes, ao GES da Estrada, á Garda Civil, aos efectivos de Protección Civil, aos Bombeiros de Santiago, e ao persoal de mantemento da vía.
O tráfico na zona foi cortado temporalmente para permitir a chegada do helicóptero medicalizado con base en Santiago, que foi mobilizado para prestar atención aos feridos. Tras recibir a asistencia, os afectados foron trasladados ao Hospital Clínico de Santiago. Un dos feridos foi evacuado en helicóptero, mentres que unha muller e os seus dous fillos foron transportados en ambulancia medicalizada.
