O presidente da Deputación da Coruña, Valentín González Formoso, e a alcaldesa de Teo, Lucía Calvo, participaron este martes no inicio das obras de ampliación e mellora do trazado da estrada provincial DP-8202 en Cacheiras. Esta actuación, cun orzamento de 561.215,62 euros e un prazo de execución de oito meses, ten como obxectivo principal incrementar a seguridade viaria na zona.
González Formoso destacou durante a visita que a construción dunha variante permitirá evitar o paso da maior parte do tráfico polo núcleo da igrexa, onde a vía actual presenta características de “estreiteza e perigo”. Segundo explicou, a nova variante suporá unha mellora significativa para os veciños, ao desviar o tráfico e reducir os riscos asociados á circulación neste punto.
As obras contemplan a creación dunha nova plataforma para a variante, así como a mellora do trazado actual da estrada, medidas que, segundo o organismo provincial, contribuirán a optimizar a circulación e a seguridade para todos os usuarios da vía.
