O delegado do Goberno en Galicia, Pedro Blanco, puxo este martes en Teo o foco sobre o papel da industria audiovisual como un dos sectores con maior capacidade de proxección económica e cultural da comunidade, ao destacar o seu carácter “estratéxico” pola súa contribución á xeración de riqueza, emprego cualificado e presenza internacional para Galicia.
Blanco realizou esta valoración durante a súa visita ás instalacións da produtora galega CTV, coincidindo coas súas catro décadas de actividade, nun percorrido no que estivo acompañado polo director xeral da compañía, Ghaleb Jaber Martínez; a directora de produción, Concha Fontenla; e a responsable de relacións externas e desenvolvemento de negocio, Ana Ferreirós.
Durante a visita, o delegado sinalou a traxectoria da empresa como exemplo dunha evolución sostida baseada na innovación e na capacidade de adaptación aos cambios do sector audiovisual. Definiu a compañía como “unha historia de innovación, talento e compromiso con Galicia” e destacou especialmente a súa aposta polo desenvolvemento de talento local e pola consolidación dun proxecto empresarial capaz de competir no mercado internacional desde Galicia.
CTV, fundada hai corenta anos, foi cualificada por Blanco como unha produtora pioneira que conseguiu reinventarse ao longo do tempo, ata converterse nunha firma con presenza en proxectos vinculados a grandes plataformas internacionais como HBO, Netflix ou Amazon. Neste contexto, salientou que o éxito da compañía exemplifica o potencial da industria audiovisual galega para operar en mercados globais mantendo unha identidade propia.
O delegado tamén incidiu na importancia de continuar impulsando a produción en lingua galega dentro deste proceso de internacionalización. “Aquí fanse as cousas ben, e o público sábeo e recoñéceo”, afirmou, ao tempo que defendeu que Galicia pode desenvolver contidos competitivos e de referencia exterior “sen renunciar ás raíces”.
Na súa intervención, Pedro Blanco sostivo ademais que Galicia se consolidou como un espazo de referencia para o sector audiovisual, atraendo empresas de ámbito estatal interesadas en producir na comunidade. Segundo indicou, este proceso reforza a posición galega dentro dun ámbito económico en expansión e contribúe á creación de novas oportunidades profesionais.
No apartado institucional, o delegado reafirmou o apoio do Goberno de España á creación e produción audiovisual galega, lembrando que nos dous últimos anos se destinaron máis de 11,2 millóns de euros ao sector en Galicia. Tamén avanzou que a nova convocatoria estatal de axudas para 2026 contará con máis de 62 millóns de euros, sete millóns máis que a do exercicio anterior.
Segundo explicou, estas liñas de financiamento buscan fortalecer a cadea de valor da industria audiovisual, incrementar a súa competitividade e favorecer o desenvolvemento de proxectos innovadores con capacidade de xerar actividade económica e emprego. A visita a CTV serviu así para escenificar o recoñecemento institucional a unha industria que, segundo o Goberno, ocupa xa unha posición destacada dentro do tecido produtivo galego.
