A Consellería de Medio Ambiente da Xunta limitouse este luns a lembrar que a súa titular, Anxos Vázquez, “xa manifestou a súa disposición a facilitar toda a información da que dispón a Xunta” sobre a planta de tratamento de residuos da construción e demolición, ante a solicitude da Plataforma STOP Planta de Residuos Cacheiras-Aldeas Limpas para concretar un encontro coa veciñanza canto antes. “Comprendemos e respectamos as inquietudes veciñais ante un proxecto destas características”, indicaron fontes da Consellería de Medio Ambiente, que, con todo, engaden que esa mesma información “xa é pública” e que ata o momento non se recibiu “ningún escrito ou alegación ao respecto”.
A XUNTA DEFENDE A VIABILIDADE AMBIENTAL DO PROXECTO
Sobre a planta de tratamento de residuos da construción e demolición que a empresa Midón quere situar entre Feros e A Torre, nunha contorna con vivendas próximas, o departamento autonómico sinala que a viabilidade da súa declaración ambiental foi estudada “polos técnicos da Xunta co máximo rigor e profesionalidade”. Neste sentido, esas mesmas fontes defenden que a “estrita tramitación ambiental” seguida é “totalmente garantista”. Ademais, explican que o informe de impacto ambiental (IIA) concluíu que “non son previsibles efectos adversos significativos derivados do proxecto”, sempre que se cumpran os condicionantes fixados tanto no documento ambiental e na restante documentación analizada como na propia resolución autonómica.
A VECIÑANZA ALERTA DE TRÁFICO PESADO, RUÍDO E EMISIÓNS DE PO
Porén, a plataforma veciñal mantén a súa oposición frontal ao proxecto e advirte de que a instalación proxectada, cunha capacidade máxima de 25.000 toneladas anuais, implicaría “un incremento significativo” do tráfico pesado e, en consecuencia, unha “maior presión” sobre os viarios locais. A isto súmanse, segundo o colectivo, o “movemento continuo de materiais”, o ruído e as emisións de po, cuestións que a veciñanza considera incompatibles coa proximidade das vivendas e co impacto que, ao seu xuízo, tería a planta sobre a calidade de vida da contorna.
