A alcaldesa de Teo, Lucía Calvo de la Uz, cualificou de “escrache” a protesta celebrada na noite do mércores diante do consistorio, na que participaron arredor de 150 veciños convocados pola Plataforma STOP Planta de Residuos Cacheiras, mentres que este colectivo defendeu que a mobilización foi “pacífica, aberta e democrática”. Nun comunicado, a rexedora popular describiu a situación como “desagradable” e asegurou que tivo que ser escoltada pola Policía Local ata o seu vehículo ante os insultos e increpacións dos manifestantes.
A concentración tiña como obxectivo amosar o rexeitamento veciñal ao proxecto da empresa Escavacións Midón, que pretende situar unha planta de tratamento de residuos da construción e demolición entre as aldeas de Feros e A Torre, nunha contorna con varias vivendas unifamiliares. Pola súa banda, a plataforma veciñal denunciou que se está tentando identificala “de maneira interesada e ficticia con feitos e actitudes” que, segundo sostén, non chegaron a producirse. Nun comunicado, o colectivo subliñou que a discrepancia política e social é “plenamente lexítima”, mentres que “a desinformación e a manipulación, non”.
“A nosa plataforma naceu e segue traballando desde unha posición veciñal, cívica e pacífica, coa vontade de defender unha preocupación real de moitos veciños de Cacheiras. Todas as accións que promovemos teñen como base o respecto democrático, a participación e a reivindicación lexítima”, afirmaron. Segundo relatan veciños presentes na mobilización, algúns manifestantes seguiron os pasos da alcaldesa ata o vehículo e pedíronlle, cando menos en dúas ocasións, “poder falar”, aínda que ela non se detivo. A concentración comezou ás 20.00 horas diante da casa do concello, con pitos, bucinas e consignas como “Alcaldesa, atende, a saúde non se vende”, “Onde está o polígono industrial?” ou “Non, non, non, á planta de Midón”.
Unha vez rematado o pleno, arredor das 21.00 horas, os concelleiros foron abandonando o edificio, mentres a alcaldesa permanecía no seu interior. Media hora despois, sobre as 21.30 horas, Lucía Calvo saíu acompañada por dous axentes da Policía Local, que a escoltaron uns metros ata o coche mentres abrían espazo cos brazos para garantir a distancia co grupo concentrado. A rexedora asegurou que acepta “as manifestacións e protestas pacíficas”, pero puntualizou que non admite “nunca os intentos de agresión a persoas, nin verbais nin físicas”. Con todo, tamén recalcou que no propio pleno xa deixara claro que entende “perfectamente o malestar da veciñanza pola situación desta planta”.
Nese punto, as posicións de fondo entre o goberno local e os veciños semellan coincidir. Lucía Calvo sostén que, se dependese dela, a planta non se instalaría nese lugar, senón no futuro polígono industrial. E esa mesma é a tese que defenden os afectados, que insisten en que o problema non é tanto a actividade en si como a súa localización nunha zona con casas moi próximas. A alcaldesa insiste, porén, en que o Concello de Teo non tivo potestade para autorizar a planta, xa que se trata, segundo di, dunha competencia exclusiva da Administración autonómica. No seu comunicado, a rexedora explica que o goberno local “non pode emitir ningún tipo de informe vinculante” e lembra que Midón xa conta con autorización ambiental da Xunta.
O consistorio engade ademais que a planta se pretende implantar en chan rústico, algo que, segundo sinala, está permitido pola Lei Galega do Solo no seu artigo 35, no apartado referido aos usos e actividades admisibles neste tipo de solo. En concreto, cita o punto que permite instalacións e infraestruturas públicas ou privadas para a xestión de residuos inertes. Con todo, os veciños afectados cuestionan de maneira directa a idoneidade do emprazamento elixido. Alertan de que a planta estaría situada nunha contorna con vivendas moi próximas e avisan das afeccións evidentes de ruído, po, tráfico pesado e impacto visual, ademais das consecuencias que podería ter sobre os accesos locais.
