Un home de 64 anos, AFP, faleceu no accidente múltiple ocorrido esta mañá en Brión , no cal chocaron dous camións que transportaban aluminio e un coche, segundo informa o 061 a Europa Press.
Segundo informa o 112 Galicia, sobre as 8,50 horas, un particular informou dun accidente con posibles persoas atrapadas no quilómetro 12 da CG-1.5, na parroquia dos Ánxeles (Brión). A situación parecía grave, pois polo menos un dos implicados permanecía inconsciente.
Unha vez no lugar, os equipos de emerxencias sinalaron que había un total de tres persoas feridas –unha delas acabou falecendo– e que ningunha delas estaba atrapada no interior dos vehículos, un dos cales acabou envorcado.
Dous dos feridos foron evacuados en ambulancia e outro foi trasladado en helicóptero medicalizado ao Hospital Clínico Universitario de Santiago (CHUS).
Foi necesario cortar a circulación para desenvolver os traballos dos servizos de emerxencias.
No operativo participan 061, Garda Civil de Tráfico, Bombeiros de Santa Comba, GES de Brión, Policía Local e servizos de mantemento de estrada.
