Os servizos de Emerxencias localizaron a pasada noite a unha veciña de Brión, duns 80 anos de idade, cuxa familia alertara da súa desaparición na tarde deste mércores. Segundo informaron fontes do CIAE 112 Galicia, sobre as 19:30 deste mércores, o fillo da muller contactou con Emerxencias para explicar que perdera o rastro da súa nai, veciña da parroquia de Bastabales.
A muller, que ten problemas de saúde, saíra de casa, posiblemente con rumbo a unha zona de monte próxima, como adoita facer habitualmente e sen previo aviso aos seus familiares. Desde o CIAE 112 deuse aviso á Garda Civil e ao GES de Brión, e activouse un dispositivo de procura, no que tamén participaron cans de rescate, e mesmo se alertou ao servizo de drons da Axega, que finalmente non foi necesario.
Os axentes informaron pasadas as 23:00 da localización da muller, que se atopaba en bo estado de saúde, aínda que igualmente solicitouse a intervención de Urxencias Sanitarias de Galicia para examinala.
